Polisi Addasiadau Rhesymol

Diweddarwyd ddiwethaf: 20 Chwefror 2026

Polisi addasiadau rhesymol ar gyfer asesiadau a gynhelir o 1 Hydref 2026 ymlaen

Fersiwn flaenorol - ar gyfer asesiadau a gymerir hyd at 30 Medi 2026

1

Cyflwyniad

1.1

Cwmpas a diben

Penodwyd Kaplan SQE Limited (Kaplan SQE) gan Solicitors Regulation Authority Limited (“SRA”) fel unig ddarparwr yr Arholiad Cymhwyso Cyfreithwyr (“SQE”) a’r Sefydliad Asesu Pwynt Terfyn (“EPAO”) ar gyfer Prentisiaid Cyfreithwyr. Mae Kaplan SQE yn ymdrin ag addasiadau rhesymol yn unol â’r Polisi hwn fel sy’n ofynnol gan yr SRA.

Rydym wedi ymrwymo i amrywiaeth ac i sicrhau bod ein dull gweithredu ar gyfer SQE yn gynhwysol ac yn bodloni ein rhwymedigaethau o dan Ddeddf Cydraddoldeb 2010. Mae’r polisi hwn yn rhoi sylw i’n dulliau gweithredu ar gyfer darparu:

• Addasiadau Rhesymol ar gyfer ymgeiswyr anabl, yn unol ag ystyr Deddf Cydraddoldeb 2010 (gweler paragraff 2.3) a
• Chymwysiadau ar gyfer y bobl hynny sydd â chyflwr dros dro neu newidiol, salwch neu anaf y tu hwnt i’w rheolaeth a allai effeithio ar eu gallu i sefyll yr SQE (gweler paragraff 2.4).

1.2

Tegwch

Rydym wedi ymrwymo i sicrhau bod y Polisi hwn yn deg ac yn dryloyw ac yn cael ei weithredu mewn ffordd sy’n:

• trin pob ymgeisydd yn gyfartal ac yn deg wrth ystyried ceisiadau
• rhoi rhesymau dros y camau rydym wedi’u cymryd a’r penderfyniad rydym yn ei wneud
• rhydd rhag rhagfarn
• cynnwys terfynau amser rhesymol ar gyfer cyflwyno ceisiadau i ni, a'n hymateb ni iddynt.

1.3

Cyfrinachedd

Byddwn yn cadw’r wybodaeth a ddarperir i ni yn gyfrinachol ac yn unol â gofynion y Rheoliad Cyffredinol ar Ddiogelu Data 2016 a Deddf Diogelu Data 2018. Bydd manylion y trefniadau unigol yn cael eu rhannu gyda’r bobl hynny y mae’n angenrheidiol iddynt wybod er mwyn cytuno a/neu weithredu’r addasiad rhesymol neu'r cymhwysiad.

1.4

Terfynau amser

Rhaid i ymgeiswyr fodloni'r terfynau amser a nodir yn y Polisi.

1.4.1

Lle bo amgylchiadau eithriadol sy’n golygu nad yw’n rhesymol i’r ymgeisydd fodloni'r terfynau amser o’r fath ar gyfer darparu gwybodaeth neu i ymateb, rhaid iddo roi gwybod i ni cyn gynted ag y bo modd a, lle bo’n berthnasol, gan gyflwyno tystiolaeth i gyfiawnhau'r oedi.

1.4.2

Lle bo hyn yn cael ei dderbyn, a lle bo'n bosibl, gallai terfynau amser newydd gael eu cytuno. Gellir adolygu’r dyddiad cau ar gyfer cyflwyno cais a'r dyddiadau cau ar gyfer derbyn Cynnig dan amgylchiadau eithriadol yn unig, am y rhesymau a nodir ym mharagraff 4.

1.5

Ymgeiswyr ag anabledd

Pan fo anabledd ar ymgeisydd, sicrheir y bydd gwybodaeth ar gael iddo mewn fformatau priodol, a gwneir addasiadau rhesymol i’r trefniadau er mwyn diwallu ei anghenion. Gweler manylion pellach ym mharagraff 6.

1.6

Adolygu’r Polisi hwn

Caiff y Polisi hwn a’r arferion cysylltiedig, gan gynnwys y cwestiynau cyffredin a gwybodaeth i aseswyr anableddau, eu monitro’n barhaus a bydd newidiadau angenrheidiol yn cael eu gwneud a’u rhoi ar waith cyn gynted ag y bo modd. Bydd Kaplan SQE yn adolygu’r polisi hwn a phob polisi cysylltiedig yn rheolaidd fel rhan o'i weithdrefnau sicrhau ansawdd parhaus.

1.7

Dogfennau cysylltiedig sy’n berthnasol i’r Polisi hwn

Mae'r cwestiynau cyffredin a gwybodaeth i aseswyr anableddau yn rhoi rhagor o wybodaeth am sut y rhoddir y Polisi hwn ar waith.

2

Ymrwymiad a dull gweithredu

2.1

Mae’r Datganiad Cymhwysedd Cyfreithiwr a’r Wybodaeth Gyfreithiol Weithredol a nodir ym Manyleb Asesu SQE1 a Manyleb Asesu SQE2 yn pennu'r cymwyseddau a’r wybodaeth y mae’n rhaid i bob ymgeisydd feddu arnynt er mwyn dangos eu gallu i ymarfer. Mae’r Safon Drothwy yn pennu'r safon y mae’n rhaid ei chyrraedd er mwyn cymhwyso fel Cyfreithiwr yng Nghymru a Lloegr. Rhaid i bob ymgeisydd gael ei asesu yn erbyn y Datganiad Cymhwysedd Cyfreithiwr a’r Wybodaeth Gyfreithiol Weithredol a rhaid iddo gyrraedd y Safon Drothwy er mwyn cymhwyso.

2.2

Er mwyn rhoi cyfle teg i bob ymgeisydd ddangos ei gymhwysedd i’r safon ofynnol, rydym yn cydnabod bod yn rhaid i ni wneud trefniadau i ddarparu addasiadau rhesymol.

2.3

Ein dull ni o ddatblygu asesiadau yw rhagweld ceisiadau ymgeiswyr am addasiadau rhesymol a, lle bo modd, gwneud trefniadau asesu sy’n lleihau’r angen i wneud addasiadau.

2.4

Byddwn yn gwneud addasiadau rhesymol lle byddai ymgeisydd, y mae anabledd arno yn unol ag ystyr Deddf Cydraddoldeb 2010, dan anfantais sylweddol yn yr asesiad o gymharu â rhywun nad oes anabledd arno.

2.4.1

Yn unol â'r Ddeddf Cydraddoldeb, mae anabledd ar berson (P) os oes:

• nam corfforol neu feddyliol ar P, a
• bod y nam yn cael effaith andwyol sylweddol a hirdymor ar allu P i gyflawni gweithgareddau arferol o ddydd i ddydd (adran 6 o Ddeddf Cydraddoldeb 2010).

Byddwn yn cymryd camau rhesymol i gael gwared ar yr anfantais sylweddol honno drwy wneud “Addasiadau Rhesymol” i drefniadau’r asesiad.

2.5

Byddwn hefyd yn ystyried ceisiadau i wneud “Cymwysiadau”. Ystyr Cymwysiadau yw newidiadau i drefniadau asesiad. Gellir gwneud cais am Gymhwysiad/Cymwysiadau pan nad oes anabledd ar yr ymgeisydd, ond bod arno salwch, cyflwr neu gyflwr newidiol, anaf neu ddigwyddiad arall y tu hwnt i’w reolaeth a fydd yn cael anfantais sylweddol ar ei allu i sefyll yr SQE mewn ffenestr asesu. Bydd pob cais am Gymwysiadau yn cael ei ystyried yn ôl disgresiwn rhesymol Kaplan a fesul achos.

3

Y broses ar gyfer gwneud cais am Addasiadau Rhesymol neu Gymwysiadau

3.1

Gellir gwneud cais am Addasiadau Rhesymol neu Gymwysiadau unwaith y bydd ymgeisydd wedi cofrestru ar gyfer cyfrif SQE.

3.2

Rhaid i ymgeisydd sy’n gwneud cais am Addasiadau Rhesymol y cyfeirir atynt ym mharagraff 2.4 uchod neu Gymwysiadau y cyfeirir atynt ym mharagraff 2.5 uchod lenwi ffurflen gais 'addasiadau rhesymol' yn ei gyfrif ymgeisydd SQE, oni bai bod trefniadau amgen wedi’u cytuno (gweler paragraff 1.5 a pharagraff 6).

3.3

Dylid gwneud ceisiadau cyn gynted ag y bo modd er mwyn caniatáu i Addasiadau Rhesymol/Cymwysiadau gael eu derbyn erbyn y dyddiad cau a bennir ym mharagraff 4.

3.4

Rhaid i'r cais gynnwys yr wybodaeth ganlynol

• natur anabledd neu salwch, cyflwr, cyflwr newidiol neu anaf yr ymgeisydd neu ddigwyddiad arall y tu hwnt i’w reolaeth;
• yr anfantais sylweddol y bydd yr ymgeisydd yn ei hwynebu heb addasiad(au) neu gymhwysiad/cymwysiadau;
• dogfennaeth gefnogol briodol i gefnogi nam neu gyflwr gan berson proffesiynol cymwys. Mae canllawiau ar y math o ddogfennaeth gefnogol sy’n briodol wedi’u pennu yn ein gwybodaeth ar gyfer aseswyr anabledd a’r cwestiynau cyffredin;
• manylion addasiadau neu gymwysiadau a wneir yn y gweithle a/neu gyda darparwr hyfforddiant, lle y bo'n berthnasol.

3.5

Os na fydd unrhyw elfen o'r wybodaeth hon ar gael ar adeg cwblhau'r ffurflen, cysylltwch â ni yn equality.quality@sqe.sra.org.uk. Ni allwn wneud cynnig Addasiadau Rhesymol na Chymwysiadau nes y bydd dogfennaeth gefnogol neu wybodaeth briodol wedi'i derbyn.

3.6

Bydd aelod o’r Tîm Cydraddoldeb yn cydnabod derbyn y ffurflen gais o fewn 5 niwrnod gwaith o dderbyn y ffurflen gais am addasiadau rhesymol, i roi gwybod i'r ymgeisydd am y camau nesaf a darparu manylion i'r ymgeisydd ar bwy sydd wedi’i benodi’n Gyswllt Addasiadau Rhesymol ("RAL").

3.7

Bydd y RAL yn ystyried:

• cais yr ymgeisydd,
• y ddogfennaeth a ddarparwyd i gefnogi’r cais am Addasiad(au) Rhesymol neu Gymhwysiad/Cymwysiadau a wnaed yn sgil yr anabledd, neu salwch, cyflwr, neu gyflwr newidiol, anaf neu ddigwyddiad arall y tu hwnt i reolaeth yr ymgeisydd;
• natur yr asesiad; a
• lle bo'n berthnasol, ein rhwymedigaethau cyfreithiol ni o dan Ddeddf Cydraddoldeb 2010.

3.8

Os bydd angen rhagor o wybodaeth er mwyn ystyried cais yr ymgeisydd, bydd y RAL yn cysylltu â'r ymgeisydd ac yn egluro pa wybodaeth ychwanegol s’n angenrheidiol.

3.9

Os bydd yr Addasiadau Rhesymol neu Gymwysiadau arfaethedig sy'n cael eu hystyried yn gymhleth, neu os bydd angen i'r RAL gydweithio â Thimau eraill Kaplan, neu â darparwr y ganolfan brofi, bydd y RAL yn rhoi gwybod i'r ymgeisydd pa gamau sydd ar y gweill a'r amserlen ar gyfer y camau hynny. Mae’n bosibl y bydd angen mwy o amser i roi’r trefniadau hyn ar waith.

3.10

Unwaith y bydd y cais a'r wybodaeth gefnogol wedi cael eu hystyried yn llawn, bydd y RAL yn cofnodi'r Addasiad(au) Rhesymol neu’r Cymhwysiad/Cymwysiadau: sef "Cynnig" - yn y cyfrif ymgeisydd SQE. Bydd y RAL yn e-bostio'r ymgeisydd i roi gwybod bod Cynnig wedi'i wneud a sut i fynd ati i dderbyn neu wrthod y Cynnig.

3.11

Os bydd yr ymgeisydd yn gwrthod y Cynnig yn ei gyfrif ymgeisydd SQE, rhaid iddo gysylltu â'i RAL i egluro pam y gwnaeth wrthod y Cynnig. Bydd y RAL yn ystyried rhesymau’r ymgeisydd am wrthod y Cynnig a, lle y bo’n briodol, mae’n bosibl y bydd Cynnig amgen yn cael ei wneud.

3.11.1

Os na wneir Cynnig amgen, gall yr ymgeisydd wneud Cais am Adolygiad (gweler paragraff 5).

4

Dyddiad cau ar gyfer gwneud cais am Addasiadau Rhesymol neu Gymwysiadau

4.1

Er mwyn i Addasiadau Rhesymol neu Gymwysiadau fod ar waith yn y ffenestr asesu benodol, rhaid i'r Addasiad(au) Rhesymol neu’r Cymhwysiad/Cymwysiadau gael eu derbyn erbyn y dyddiad cau ar gyfer cyflwyno'r ffurflen archebu sedd ar gyfer y ffenestr asesu benodol honno.

Mae'r amserlen hon am y rhesymau canlynol:

• Darparu amser i roi gwybod i'r ymgeisydd am unrhyw wybodaeth gefnogol ychwanegol mae ei hangen ar gyfer ei gais, ac i'r wybodaeth gefnogol honno gael ei darparu.
• Er mwyn i sedd gael ei harchebu gyda'r Addasiad(au) Rhesymol neu’r Cymhwysiad/Cymwysiadau y cytunwyd arnynt.
• Rhaid archebu sedd asesu gyda'r Addasiad(au) Rhesymol neu’r Cymhwysiad/Cymwysiadau y cytunwyd arnynt.
• Darparu amser digonol i Kaplan a darparwr y ganolfan brofi i drefnu staffio, trefnu i ddarparu offer arbenigol, a gwneud yr holl drefniadau angenrheidiol eraill ar gyfer darparu'r Addasiad(au) Rhesymol neu’r Cymhwysiad/Cymwysiadau.
• Mae'r cynllun terfynol yn galluogi ymgeisydd i baratoi ar gyfer ei asesiad ac i gwblhau asesiadau ymarferol gan ystyried yr Addasiad(au) Rhesymol neu’r Cymhwysiad/Cymwysiadau y cytunwyd arnynt.

4.2

Os nad yw'r ymgeisydd yn derbyn y Cynnig cyn y dyddiad cau ar gyfer cyflwyno'r ffurflen archebu sedd yn y ffenestr asesu berthnasol, byddwn yn neilltuo sedd dros dro i'r ymgeisydd. Ni allwn warantu y bydd y sedd dros dro yn cael ei throsi i sedd wedi'i harchebu ar gyfer y ffenestr asesu a ffefrir. Mae hyn oherwydd ei bod hi’n bosibl na fydd y cyfleusterau ar gael yn y ganolfan brofi erbyn i’r Cynnig gael ei dderbyn.

4.2.1

Lle nad yw Cynnig yn cael ei dderbyn neu le na ellir cytuno ar Gynnig o fewn pythefnos o'r dyddiad cau ar gyfer cyflwyno'r ffurflen archebu sedd, bydd y sedd dros dro yn cael ei rhyddhau, oni bai bod yr ymgeisydd yn aros am ganlyniad Cais am Adolygiad (gweler paragraff 5).

4.3

Dim ond dan amgylchiadau eithriadol y bydd ceisiadau a wneir ar ôl y dyddiad cau ar gyfer cyflwyno'r ffurflen archebu sedd yn cael eu hystyried.

4.3.1

Enghraifft o amgylchiad eithriadol yw lle mae ymgeisydd wedi derbyn diagnosis ar ôl y terfyn amser i gyflwyno'r ffurflen archebu sedd, neu nad oedd ei gyflwr yn hysbys (er enghraifft beichiogrwydd).

4.3.2

Rhaid i'r ymgeisydd egluro pam nad oedd yn gallu gwneud cais cyn y dyddiad cau ar gyfer cyflwyno'r ffurflen archebu sedd.

4.3.3

Er y byddwn yn mynd ati i gynnig a gweithredu Addasiadau Rhesymol neu Gymwysiadau priodol, efallai na fydd hi’n bosibl i Addasiadau Rhesymol neu Gymwysiadau fod ar waith ar gyfer ffenestr asesu y mae’r ymgeisydd yn ei ffafrio am y rhesymau canlynol:

• Newidiadau i’r amser asesu (amser ychwanegol neu seibiannau stopio'r cloc): mae’n bosibl y bydd hyn yn golygu bod yn rhaid gwneud newidiadau i staffio canolfannau profi, amserlennu asesiadau, a’r cyfleusterau sydd ar gael ar gyfer seddi asesu y tu hwnt i amserlen asesu safonol yr SQE.
• Trefniadau logistaidd ar gyfer deunyddiau asesu: mae hyn yn cynnwys yr angen i wneud newidiadau i ddeunyddiau asesu ac i ddarparu deunyddiau neu offer sydd wedi'u haddasu i'r ganolfan brofi.
• Addasiadau asesu: gallai addasiadau olygu bod yn rhaid newid y llwyfan asesu ar-lein.
• Sicrhau ansawdd: Cynnal gwiriadau sicrhau ansawdd ar gyfer darparu'r asesiad.

5

Cais am Adolygiad

5.1

Gall ymgeisydd sydd wedi gwrthod y Cynnig ac wedi esbonio i'w RAL y rhesymau dros wrthod, wneud cais wedyn am adolygiad o'r Cynnig (“Cais am Adolygiad”).

5.2

Rhaid i'r Cais am Adolygiad nodi esboniad yr ymgeisydd am pam nad yw wedi derbyn ei Gynnig a rhaid i hyn gael ei anfon, ynghyd ag unrhyw ddogfennaeth a gwybodaeth bellach i equality.quality@sqe.sra.org.uk gyda ‘Request for review of adjustments proposal’ yn llinell pwnc yr e-bost.

5.3

Bydd adolygydd (aelod uwch o Kaplan SQE - yr “Adolygydd”) yn adolygu'r cais ac mae’n bosibl y bydd yn ceisio gwybodaeth bellach ac yn derbyn cyngor fel y bo'n briodol.

5.4

Bydd yr Adolygydd yn ystyried yr holl ffactorau perthnasol, gan gynnwys:

• yr wybodaeth yn y cais am addasiad rhesymol a'r wybodaeth a ddarparwyd gan yr ymgeisydd;
• unrhyw ddogfennaeth gefnogol ychwanegol;
• natur yr anabledd y ceisir Addasiadau Rhesymol ar ei gyfer o dan baragraff 3.3 o’r Polisi;
• natur y salwch, y cyflwr neu'r cyflwr newidiol, yr anaf neu’r digwyddiad arall y tu hwnt i reolaeth yr ymgeisydd y ceisir Cymwysiadau ar ei gyfer o dan baragraff 3.3 o’r Polisi;
• yr wybodaeth a ddarparwyd yn y Cais am Adolygiad;
• yr Addasiad(au) Rhesymol neu’r Cymhwysiad/Cymwysiadau a gynigir i'r ymgeisydd; a/neu lle bo’n berthnasol, penderfyniad i beidio â chynnig Addasiad Rhesymol neu Gymhwysiad; ac
• a yw'n bosibl gweithredu'r Addasiadau Rhesymol neu'r Cymwysiadau y gwneir cais amdanynt ai peidio, mewn perthynas ag amseru’r asesiad.

5.5

Gall yr Adolygydd:

• gadarnhau'r Cynnig gwreiddiol a wnaed; neu
• wrthod y Cynnig.

5.6

Pan fydd yr Adolygydd yn gwrthod y Cynnig a wnaed, gall argymell camau pellach, a bydd yr ymgeisydd fel arfer yn cael Cynnig wedi'i ddiwygio.

5.7

Bydd penderfyniad yr Adolygydd yn cael ei gyfleu i'r ymgeisydd o fewn 10 diwrnod gwaith o dderbyn y Cais am Adolygiad. Os caiff Cynnig ei ddiwygio, bydd y cynnig newydd yn cael ei anfon at yr ymgeisydd trwy ei gyfrif ymgeisydd SQE o fewn 5 niwrnod gwaith o benderfyniad yr Adolygydd.

6

Ffyrdd amgen o wneud cais am addasiadau

6.1

Lle na fydd ymgeisydd yn gallu defnyddio’r cyfrif ymgeisydd SQE/y broses gofrestru ac archebu ar-lein (gan gynnwys gwneud cais am addasiadau rhesymol a chyflwyno tystiolaeth gefnogol), gallwn gynnig dulliau gwahanol o gyfathrebu, a darparu gwybodaeth mewn gwahanol fformatau.

6.2

Dylai ymgeiswyr y mae angen rhagor o gymorth arnynt gysylltu â ni yn enquiries@sqe.sra.org.uk neu 0203 486 3080, a bydd aelodau o’n tîm yn gweithio gydag ymgeiswyr i ddod o hyd i’r ffordd orau o helpu.