SQE1 Cwestiynau enghreifftiol

Cwestiwn 61

Mae dyn yn ymddiriedolwr (trustee) ar gyfer cronfa o £500,000. Yn groes i’r ymddiriedolaeth, mae’n trosglwyddo £200,000 o arian yr ymddiriedolaeth i’w bartner i’w galluogi hi i brynu tŷ. Mae’r dyn yn gwneud hyn gan ei fod eisiau creu argraff arni.

Mae partner y dyn yn gwybod nad yw’r dyn yn ddigon cyfoethog i allu fforddio trosglwyddo £200,000 iddi. Mae hi’n gwybod bod ganddo nifer o gredydwyr sy’n dod i gyfanswm o fwy na £200,000. Roedd y dyn wedi dweud wrthi ar sawl achlysur blaenorol ei fod yn ymddiriedolwr ac y byddai’n barod i gymryd arian yn anghyfreithlon gan yr ymddiriedolaeth i’w ddefnyddio at ei ddibenion ei hun.

Ni ofynnodd partner y dyn ynglŷn â ffynhonnell y £200,000, gan ei bod hi’n teimlo trueni dros y dyn ac nid oedd am frifo ei deimladau. Ar ben hyn, roedd hi’n awyddus i gael yr arian i’w ddefnyddio at ei dibenion ei hun. Yn lle prynu tŷ, gwariodd yr holl arian ar bartïon a gwyliau drud.

Erbyn hyn mae’r dyn wedi diflannu, yn dal mewn dyled i’w gredydwyr. Mae buddiolwyr (beneficiaries) yr ymddiriedolaeth bellach am wneud hawliad personol o £200,000 yn erbyn y partner.

A yw hawliad personol yn erbyn y partner yn debygol o lwyddo?

A. Ydy, gan ei bod hi wedi ymddwyn yn anonest wrth gynorthwyo’r dyn i dorri ei ymddiriedolaeth.

B. Ydy, gan fod yr wybodaeth a oedd ganddi yn ei gwneud hi’n amheus ond penderfynodd beidio â holi am yr arian.

C. Nac ydy, gan iddi ddefnyddio’r arian at ddibenion gwahanol i’r diben yr oedd y dyn yn ei fwriadu.

D. Nac ydy, gan nad oedd ganddi wybodaeth wirioneddol bod y dyn yn torri ymddiriedolaeth.

E. Nac ydy, gan ei bod hi wedi gwastraffu’r arian a roddodd y dyn iddi.