Safon yr Ymddygiad a Ddisgwylir gan Ymgeiswyr SQE

Diweddarwyd ddiwethaf: 28 Mehefin 2024

Cyflwyniad

Mae'r ddogfen hon yn nodi safon yr ymddygiad a ddisgwylir gan ymgeiswyr SQE cyn, yn ystod ac ar ôl asesiad.

Safon yr ymddygiad a ddisgwylir

Gall ymgeiswyr SQE wneud cais i ddod yn gyfreithiwr yng Nghymru a Lloegr os byddant yn pasio SQE ac yn bodloni'r meini prawf cymhwysedd a ragnodir gan yr Awdurdod Rheoleiddio Cyfreithwyr (SRA). Cyn, yn ystod ac ar ôl asesiad, disgwylir i ymgeiswyr SQE ymddwyn mewn modd sy'n gyson â Rheolau SRA ar Asesu Cymeriad ac Addasrwydd a Chod Ymddygiad SRA i Unigolion. Mae'r rhain yn disgrifio'r safonau proffesiynoldeb, gonestrwydd a didwylledd y mae SRA yn eu disgwyl gan gyfreithwyr yng Nghymru a Lloegr.

Os oes tystiolaeth bod ymddygiad ymgeisydd yn codi pryderon difrifol am eu dealltwriaeth o Egwyddorion neu God Ymddygiad i Gyfreithwyr SRA neu ei allu i gydymffurfio â nhw, caiff y mater ei gyfeirio at SRA i'w ystyried fel rhan o'r asesiad o gymeriad ymgeisydd a pha mor addas ydyw i'w dderbyn fel cyfreithiwr yn unol â Rheolau SRA ar Asesu Cymeriad ac Addasrwydd.

Mae enghreifftiau o'r mathau o ymddygiad y gellid eu cyfeirio at SRA yn cynnwys pan fydd ymgeisydd:

• Yn aflonyddu ar staff sy'n ymwneud â darparu SQE, yn eu bwlio neu'n amharchus tuag atynt mewn ffordd arall
• Yn aflonyddu ar ymgeiswyr eraill, yn eu bwlio neu'n amharchus tuag atynt mewn ffordd arall
• Yn ystod tasg asesu SQE2, yn ymddwyn mewn ffordd a fyddai'n anghyson ag Egwyddorion neu God Ymddygiad SRA ar gyfer Unigolion, er enghraifft, os byddant yn:
  • Cynghori cleient i ddinistrio tystiolaeth berthnasol nad yw'n ddefnyddiol
  • Cynghori cleient i lwgrwobrwyo tyst
  • Ymddwyn mewn ffordd, neu gynghori cleient i ymddwyn mewn ffordd, sy'n gwahaniaethu'n anghyfreithlon yn erbyn unigolyn ar sail eu nodweddion gwarchodedig.

Atgoffir ymgeiswyr, wrth gofrestru ar gyfer SQE, ystyrir eu bod yn deall, wrth gymryd asesiad SQE, eu bod yn cytuno i'r amodau a'r rhwymedigaethau a bennir yn:

• Rheoliadau Asesu
• Polisi Cyfrinachedd Ymgeiswyr

Sylwer: dyma'r testun ynghylch Safon yr Ymddygiad a Ddisgwylir a fydd yn ymddangos ar y dudalen gofrestru, gyda dolenni uniongyrchol i'r Rheoliadau Asesu a Pholisi Cyfrinachedd Ymgeiswyr. Mae'r tair dogfen ar gael yn adran Polisïau y wefan.

Rwy'n cydnabod fy mod wedi darllen a thrwy hyn yn cytuno â Rheoliadau Asesu SQE yn ogystal â Safon yr Ymddygiad a Ddisgwylir.