SQE1 Cwestiynau enghreifftiol

Cwestiwn 64

Mae menyw yn ffonio’r gwasanaethau brys ac yn siarad â pherson sy’n trin galwadau ac nad yw’n heddwas (civilian call handler). Mae hi’n swnio’n drist ac yn crio. Mae hi’n honni bod ei gŵr, y mae hi’n ei enwi, newydd ymosod arni trwy ei dyrnu (punch) hi yn y wyneb. Mae hi’n dweud ei bod hi wedi cloi ei hun yn yr ystafell ymolchi yn eu tŷ i wneud yr alwad am ei bod yn ofni y bydd e’n ymosod arni unwaith eto. Mae hi’n gofyn i swyddogion yr heddlu ddod i’w cyfeiriad. Mae’r alwad yn cael ei recordio.

Pan mae’r heddweision yn cyrraedd ychydig funudau’n ddiweddarach mae’r gŵr yn dal i fod yn y tŷ. Mae’r fenyw wedi’i chloi yn yr ystafell ymolchi ac mae’n dal i fod yn ofidus ac yn crio. Mae’r heddweision sy’n bresennol yn perswadio’r fenyw i ddod allan o’r ystafell ymolchi ac maent yn sylwi bod ei hwyneb yn goch a bod cleisiau arno. Mae’r gŵr yn cael ei arestio ar amheuaeth o ymosod ar y fenyw. Mae’r fenyw yn gwrthod rhoi datganiad i’r heddweision.

Mae’r gŵr yn arfer ei hawl i aros yn ddistaw pan gaiff ei gyfweld gan swyddogion yr heddlu dan rybudd (under caution). Mae’n cael ei gyhuddo o ymosodiad cyffredin (common assault). Mae’n pledio’n ddieuog ac mae ei achos yn cael ei ohirio ar gyfer treial (adjourned for trial). Mae’r fenyw yn gwrthod dod i’r llys i roi tystiolaeth gan ddweud nad yw hi’n ofni ei gŵr a’i bod am i’w perthynas barhau. Mae’r erlyniad (prosecution) yn dymuno dibynnu ar y cyfrif a roddodd y fenyw yn ystod ei galwad ffôn i’r gwasanaethau brys yn nhreial y gŵr.

Yn nhreial y gŵr, fel rhan o’r res gestae, a oes modd derbyn yr wybodaeth a roddodd y fenyw yn ystod yr alwad ffôn?

A. Nac oes, gan na fydd y fenyw’n rhoi tystiolaeth lafar yn nhreial y gŵr.

B. Nac oes, gan nad yw’r fenyw wedi rhoi datganiad ysgrifenedig.

C. Oes, gan i’r wybodaeth gael ei rhoi dan amgylchiadau lle gellir diystyru’r posibilrwydd o ffugio (concoction).

D. Oes, gan fod yr wybodaeth wedi’i chadarnhau gan y cochni a’r cleisio ar wyneb y fenyw a welodd swyddogion yr heddlu a oedd yn bresennol.

E. Na, gan na chafodd yr wybodaeth ei rhoi i swyddog yr heddlu.