SQE1 Cwestiynau enghreifftiol

Cwestiwn 26

Bu farw menyw. Rai diwrnodau ar ôl dod o hyd i’w chorff, aeth ei gŵr i dafarn a mynd yn feddw iawn. Cyfaddefodd wrth ffrind ei fod wedi lladd ei wraig am ei fod yn genfigennus o’i pherthynas â dyn arall. Clywodd rheolwr y bar y sgwrs hon.

Rhoddodd ffrind y gŵr a’r rheolwr ddatganiadau i’r heddlu a oedd yn rhoi manylion cyfaddefiad y gŵr. Mae’r gŵr wedi cael ei arestio ar amheuaeth o lofruddiaeth, ac wedi cael ei gyfweld dan rybudd (under caution). Bryd hynny gwadodd (deny) ei fod wedi lladd ei wraig, a gwadodd wneud y cyfaddefiad i’w ffrind.

A fyddai cyfaddefiad y gŵr wrth ei ffrind yn y bar yn dderbyniol fel eithriad i’r rheol yn erbyn tystiolaeth achlust (hearsay evidence)?

A. Na fyddai, gan fod y cyfaddefiad wedi cael ei wneud y tu allan i’r treial.

B. Na fyddai, oherwydd na chafodd y cyfaddefiad ei gadarnhau gan y gŵr yn ei gyfweliad dan rybudd.

C. Byddai, gan fod mwy nag un person yn gallu cadarnhau’r cyfaddefiad.

D. Byddai, gan mai cyfaddefiad i drosedd yw hyn.

E. Na fyddai, gan fod y gŵr yn feddw pan wnaeth y cyfaddefiad.