Polisi Ffit i Sefyll

Diweddarwyd ddiwethaf: Rhagfyr 2024

• Mae Polisi Ffit i Sefyll ar waith ar gyfer pob asesiad Arholiad Cymhwyso Cyfreithwyr (SQE). Cyfrifoldeb pob ymgeisydd yw sicrhau ei fod yn sefyll yr asesiad dim ond os yw’n ffit i wneud hynny. Mae bod yn ‘Ffit i Sefyll’ yn golygu nad yw’r ymgeisydd yn gwybod am unrhyw reswm pam y byddai effaith andwyol ar ei berfformiad yn ystod yr asesiad neu pam y gallai wedyn gyflwyno cais am amgylchiadau esgusodol. Dyma enghreifftiau o’r sefyllfaoedd y byddai hyn yn berthnasol iddynt:
  
  
  • salwch ymgeisydd
  • salwch perthynas agos
  • profedigaeth
• Mae’r gofyniad o ran bod yn ffit i sefyll wedi’i gynnwys yn Rheoliadau Asesu SQE ac mae’n berthnasol i bob asesiad SQE. Mae’n ofynnol i bob ymgeisydd lofnodi datganiad neu gadarnhau’n electronig ei fod yn ffit i sefyll yr asesiad. Mae’r datganiad hwn wedi’i atgynhyrchu isod. Ni chaniateir i ymgeiswyr ddechrau’r asesiad oni bai eu bod wedi llofnodi Datganiad Ffit i Sefyll.
• Os bydd ymgeisydd yn credu nad yw’n ffit i sefyll asesiad SQE a’i fod am dynnu’n ôl cyn dechrau’r asesiad, rhaid iddo gyfeirio at Delerau ac Amodau Asesu’r Arholiad Cymhwyso Cyfreithwyr. Gellir darparu ad-daliad rhannol yn amodol ar gyflwyno tystiolaeth briodol o fewn yr amser penodedig.
• Os bydd ymgeisydd yn mynd yn sâl iawn yn ystod asesiad neu os yw’n wynebu amgylchiadau personol annisgwyl neu anrhagweladwy y tu hwnt i’w reolaeth resymol sy’n cael, neu sy’n debygol o gael, effaith sylweddol ac andwyol ar ei berfformiad, dylai ystyried a yw am gyflwyno cais am amgylchiadau esgusodol. Ym mhob achos, rhaid i’r ymgeisydd roi gwybod i Oruchwyliwr yr arholiad am y salwch neu’r amodau personol annisgwyl neu anrhagweladwy cyn gynted â phosibl a chyn gadael y lleoliad asesu fan bellaf. Os bydd ymgeisydd yn cyflwyno hawliad amgylchiadau esgusodol wedi hynny am salwch neu amgylchiadau personol a gododd yn ystod yr asesiad ac nad yw wedi adrodd am y mater i oruchwyliwr neu broctor, bydd yr hawliad amgylchiadau esgusodol fel arfer yn cael ei wrthod oni bai bod yr ymgeisydd yn gallu rhoi manylion amgylchiadau eithriadol pam nas adroddwyd am y mater.
• Ni fydd marciau’n cael eu haddasu oherwydd salwch, neu amgylchiadau personol annisgwyl neu anrhagweladwy eraill. Ceir manylion llawn yn Rheoliadau Asesu SQE a’r Polisi Amgylchiadau Esgusodol.
• Fel arfer, ni dderbynnir hawliad amgylchiadau esgusodol a wneir mewn perthynas ag amgylchiadau a oedd yn bodoli cyn i'r ymgeisydd lofnodi'r "datganiad ffit i sefyll" oni bai bod ymgeisydd yn gallu dangos tystiolaeth glir pam y rhoddodd gynnig ar yr asesiad a llofnodi'r datganiad 'ffit i sefyll'.
• Dyma enghreifftiau o'r amgylchiadau na fyddant yn cael eu derbyn lle mae ymgeisydd wedi llofnodi'r datganiad 'ffit i sefyll' ac wedi sefyll yr asesiad wedi hynny. Nid yw'r rhestr yn un gynhwysfawr:
  
  
  • yr angen i sefyll yr asesiad oherwydd dyddiadau cyflogaeth neu gontract hyfforddi
  • problemau sy'n effeithio ar baratoi / amser astudio cyn asesiad
  • sefyll yr asesiad oherwydd cost y ffioedd asesu neu ffioedd canslo asesiadau.

Datganiad Ffit i Sefyll

Rwy’n cadarnhau fy mod wedi darllen y Polisi Ffit i Sefyll ac ni wn am unrhyw reswm a allai gael effaith andwyol ar fy mherfformiad yn ystod yr asesiad ………….. (nodwch fel sy’n briodol) neu pam y gallwn wedyn gyflwyno cais am amgylchiadau esgusodol ynghylch asesiad heddiw.

Rwy'n cadarnhau, os byddaf yn mynd yn sâl iawn yn ystod yr asesiad hwn neu'n profi amgylchiadau personol annisgwyl neu anrhagweladwy eraill y tu hwnt i'm rheolaeth, y byddaf yn rhoi gwybod i oruchwyliwr neu broctor yr arholiad cyn gynted â phosibl a chyn gadael y lleoliad asesu fan bellaf.