Polisi Apeliadau

Diweddarwyd ddiwethaf: Gorffennaf 2025

1

Cyflwyniad

Cwmpas a diben

Penodwyd Kaplan SQE Limited (Kaplan SQE) gan Solicitors Regulation Authority Limited (“SRA”) fel unig ddarparwr yr Arholiad Cymhwyso Cyfreithwyr (yr “Asesiad”) a’r Sefydliad Asesu Pwynt Terfyn (“EPAO”) ar gyfer Prentisiaid Cyfreithwyr. Mae Kaplan SQE yn delio ag apeliadau yn unol â’r Polisi hwn fel sy’n ofynnol gan SRA.

Mae'r Polisi hwn yn nodi'r gweithdrefnau sydd i'w dilyn mewn achosion lle bydd ymgeisydd yn dymuno apelio yn erbyn penderfyniad y Bwrdd Asesu. I osgoi amheuaeth, ni all apêl y dyfernir o’i phlaid arwain at newid i'r marc pasio na newid marciau ymgeisydd.

Pan fydd apêl yn cynnwys cwyn, byddwn yn gohirio’r gŵyn. Bydd y broses gwyno yn mynd rhagddi unwaith y bydd y broses Apelio wedi dod i ben. Dylech gyfeirio hefyd at y Polisi Cwynion.

1.1

Tegwch

Rydym wedi ymrwymo i sicrhau bod y Polisi hwn yn deg ac yn dryloyw ac yn cael ei weithredu mewn ffordd sy’n:

trin pob ymgeisydd yn gyfartal ac yn deg wrth ystyried apeliadau.
rhoi rhesymau dros y camau rydym wedi’u cymryd a’r penderfyniad rydym yn ei wneud
rhydd rhag rhagfarn
cynnwys amserlenni rhesymol ar gyfer cyflwyno ceisiadau i ni a derbyn ymatebion gennym ni.

1.2

Cyfrinachedd

Bydd gwybodaeth a ddarperir gan ymgeiswyr dan y gweithdrefnau hyn yn cael ei thrin yn gyfrinachol a bydd dim ond yn cael ei rhannu gyda’r bobl hynny y mae’n rhaid iddynt wybod er mwyn ystyried yr apêl.

1.3

Amserlenni

Rydym yn disgwyl i ymgeiswyr fodloni'r terfynau amser a nodir yn y polisi. Pan fydd amgylchiadau eithriadol sy’n golygu na all ymgeisydd fodloni'r terfynau amser yn rhesymol, rhaid i’r ymgeisydd roi gwybod i ni cyn gynted ag y bo modd gan gyflwyno tystiolaeth i gyfiawnhau'r oedi. Pan fydd y dystiolaeth hon yn cael ei derbyn, a lle bo'n bosibl, caiff terfynau amser newydd eu cytuno.(Gweler paragraffau 4.10 a 7.10).

1.4

Ymgeiswyr ag anabledd

Pan fydd ymgeisydd yn nodi bod ganddo anabledd, bydd gwybodaeth ar gael iddo mewn fformatau priodol, a gellid gwneud addasiadau rhesymol er mwyn diwallu ei anghenion.

1.5

Adolygu’r Polisi hwn

Caiff y Polisi hwn ei fonitro’n barhaus a bydd newidiadau angenrheidiol yn cael eu gwneud a’u rhoi ar waith cyn gynted ag y bo modd. Ar y lleiaf, bydd Kaplan SQE yn adolygu’r polisi hwn a’r holl bolisïau cysylltiedig yn rheolaidd fel rhan o’i weithdrefnau sicrhau ansawdd.

2

Diffiniadau

Amgylchiadau esgusodol:

a: Camgymeriad neu afreoleidd-dra wrth weinyddu neu gynnal yr asesiad; neu
b: Tystiolaeth o ragfarn wrth gynnal yr asesiad; neu
c: Yn amodol ar y Polisi Ffit i Sefyll a Rheoliadau Asesu SQE, salwch ymgeisydd neu amgylchiadau personol eraill y tu hwnt i’w reolaeth resymol

sy’n cael, neu sy'n debygol o gael, effaith sylweddol ac andwyol ar farciau neu berfformiad ymgeisydd yn yr asesiad.

3

Apeliadau

3.1: Mae’r Polisi hwn yn darparu ar gyfer proses apelio ffurfiol sydd â dau gam: yr apêl cam cyntaf a’r apêl cam terfynol.
3.2

4

Apêl cam cyntaf

4.1

At ddibenion y Polisi hwn, mae apêl cam cyntaf yn golygu cais am adolygiad o benderfyniad y Bwrdd Asesu am fethiant ymgeisydd mewn unrhyw asesiad sy’n cynnwys SQE1 a/neu SQE2 yr Arholiad Cymhwyso Cyfreithwyr (SQE) neu ganfyddiad o gamymarfer neu ymddygiad amhriodol.

4.2

Gellir gwneud apêl cam cyntaf ar un neu ragor o’r seiliau canlynol yn unig:

4.2.1: os oes amgylchiadau esgusodol na ellid bod wedi eu cyflwyno gerbron y Bwrdd Asesu cyn iddo wneud ei benderfyniad; neu
4.2.2: bod penderfyniad y Bwrdd Asesu, neu'r modd y gwnaed y penderfyniad hwnnw, yn cynnwys afreoleidd-dra sylweddol a/neu ei fod yn amlwg yn afresymol a/neu'n afresymegol; neu
4.2.3: bod yr ymgeisydd yn amau canfyddiad y Bwrdd Asesu o gamymarfer neu ymddygiad amhriodol.

4.3

Bydd apêl ar y sail bod ymgeisydd yn anghytuno â chanlyniad ei hawliad amgylchiadau esgusodol yn cael ei hystyried dim ond os oes gwybodaeth neu dystiolaeth newydd na ellid ei chyflwyno ar y pryd i gefnogi'r hawliad amgylchiadau esgusodol gwreiddiol.

4.4

At ddibenion 4.2.1 nid yw’r ffaith nad oedd yr ymgeisydd yn ymwybodol o’i ganlyniadau eto yn rheswm pam na ellid bod wedi cyflwyno hawliad amgylchiadau esgusodol gerbron y Bwrdd Asesu.

4.5

Ni fydd unrhyw apêl yn cael ei hystyried ar y sail bod ymgeisydd:

4.5.1: yn dymuno herio dyfarniad academaidd yr asesydd neu’r meini prawf a ddefnyddir i asesu gwaith yr ymgeisydd. Ystyr dyfarniad academaidd yw'r wybodaeth a'r arbenigedd proffesiynol ac ysgolheigaidd y mae'r aseswyr wedi eu defnyddio i ddod i benderfyniad ynghylch perfformiad ymgeisydd mewn asesiad;
4.5.2: heb ddeall neu nid oedd yn ymwybodol o Reoliadau Asesu SQE.

4.6

Cyflwyno apêl cam cyntaf

Rhaid i ymgeisydd gyflwyno ei apêl cam cyntaf erbyn 16:00 GMT ar y degfed diwrnod gwaith ar ôl dyddiad rhyddhau'r canlyniadau. Pan na ellir darparu tystiolaeth o fewn y 10 diwrnod gwaith, rhaid cyflwyno'r ffurflen apêl cam cyntaf o fewn y terfyn amser gyda thystiolaeth i ddilyn. Gellid cytuno â’r ymgeisydd ar ddyddiad cau gwahanol ar gyfer cyflwyno tystiolaeth hwyr fel a amlinellir ym mharagraff 4.10.

4.6.1: Pan fydd yr apêl cam cyntaf yn ymwneud â hawliad amgylchiadau esgusodol SQE1, rhaid i'r ymgeisydd gyflwyno ei ffurflen apêl cam cyntaf o fewn 10 diwrnod gwaith o ddyddiad y llythyr sy’n rhoi canlyniad y cais am amgylchiadau esgusodol.
4.6.2: Pan fydd yr apêl mewn perthynas ag achos o gamymarfer neu ymddygiad amhriodol, rhaid cyflwyno'r apêl o fewn 10 diwrnod gwaith o lythyr canlyniad y Bwrdd Asesu.

4.7

Codir ffi o £350 am apêl cam cyntaf. Bydd hyn yn cael ei had-dalu os dyfernir o blaid yr apêl.

4.7.1: Pan fydd yr apêl cam cyntaf yn ymwneud â chamgymeriad neu afreoleidd-dra wrth ddarparu’r cynllun addasiadau rhesymol y cytunwyd arno, caiff yr ymgeisydd ei eithrio rhag talu ffi’r apêl cam cyntaf.

4.8

O fewn 2 ddiwrnod gwaith o gyflwyno ffurflen yr apêl cam cyntaf, bydd yr ymgeisydd yn derbyn e-bost yn ei gyfarwyddo i ffonio'r Tîm Gwasanaethau Ymgeiswyr i dalu ffi’r apêl, ac yn rhoi gwybod iddo am y dyddiad cau ar gyfer talu a chanlyniadau diffyg talu.

4.9

Mae cyflwyno apêl cam cyntaf wedi digwydd pan fydd ffurflen yr apêl ac unrhyw dystiolaeth ategol wedi’u cyflwyno a ffi’r apêl wedi’i thalu. Rhaid gwneud hyn i gyd erbyn y dyddiadau cau.

4.10

Fel a bennir ym mharagraff 1.4, disgwylir i ymgeiswyr fodloni'r terfynau amser wrth gyfathrebu â ni. Os na ellir darparu tystiolaeth berthnasol o fewn y 10 diwrnod gwaith, rhaid i ymgeiswyr gysylltu â'r Tîm Cydraddoldeb ac Ansawdd equality.quality@sqe.sra.org.uk i esbonio'r rheswm am yr oedi wrth gyflwyno'r dystiolaeth ysgrifenedig. Bydd y Tîm Cydraddoldeb ac Ansawdd yn cynghori'r ymgeisydd am unrhyw ddyddiad cau diwygiedig ar gyfer cyflwyno'r dystiolaeth ysgrifenedig sy’n weddill. Bydd dyddiad cau newydd ar gyfer cyflwyno yn cael ei bennu yn unol â dyddiad cau Panel yr Apêl Cam Cyntaf a drefnwyd, fel a bennir ym mharagraff 5.1 o'r polisi.

4.11

Ni fydd apeliadau cam cyntaf a gyflwynir ar ôl y dyddiad cau ym mharagraff 4.6 yn cael eu derbyn. Ar ôl y dyddiadau hyn, gall ymgeisydd gyflwyno Cais i gyflwyno apêl cam cyntaf yn hwyr yn unol â pharagraff 10.

5

Y weithdrefn ar gyfer ystyried apêl cam cyntaf

5.1

Bydd Panel yr Apêl Cam Cyntaf yn cwrdd o fewn 25 diwrnod gwaith o’r dyddiad cau pan fydd yn rhaid i ymgeiswyr gyflwyno eu hapêl cam cyntaf.

5.2

Bydd tri aelod ar Banel yr Apêl Cam Cyntaf, a fydd yn cynnwys o leiaf un aelod o’r panel sy’n annibynnol ar Kaplan ac SRA. Ni fydd yr un o aelodau’r panel wedi bod yn aelodau o’r Bwrdd Asesu a oedd yn ystyried canlyniad yr ymgeisydd neu a wnaeth ganfyddiad o gamymarfer neu ymddygiad amhriodol. Bydd o leiaf un aelod yn Gyfreithiwr Cymru a Lloegr (yn ymarfer neu ddim yn ymarfer). Bydd un aelod yn cadeirio’r panel.

5.3

Bydd Panel yr Apêl Cam Cyntaf yn penderfynu a yw’r apêl yn:

5.3.1: cael ei gwneud ar un neu ragor o'r seiliau a nodir yn 4.2; ac
5.3.2: wedi’i phrofi gan y dystiolaeth a ddarparwyd.

5.4

Caiff Panel yr Apêl Cam Cyntaf ymgynghori â Chadeirydd y Bwrdd Asesu, aelodau’r Bwrdd Asesu ac unrhyw bobl berthnasol eraill i gael tystiolaeth a gwybodaeth.

6

Penderfyniad Panel yr Apêl Cam Cyntaf

6.1

Gall Panel yr Apêl Cam Cyntaf wneud un o’r penderfyniadau canlynol

6.1.1: dyfarnu o blaid yr apêl
6.1.2: dyfarnu yn erbyn yr apêl

6.2

Ni all Panel yr Apêl Cam Cyntaf newid marc pasio.

6.3

Pan ddyfernir o blaid apêl ynglŷn â chanfyddiad o gamymarfer neu ymddygiad amhriodol, bydd marc yr ymgeisydd yn yr asesiad yn sefyll.

6.4

Pan ddyfernir o blaid apêl ymgeisydd, fel arfer caiff ei ymgais ei ddiystyru.

6.4.1: Pan ddyfernir o blaid apêl a gafodd ei chyflwyno ynglŷn ag SQE2 dan baragraff 4.2.1 neu 4.3, bydd Panel yr Apêl Cam Cyntaf yn penderfynu ar y canlyniad yn unol ag egwyddorion y Polisi Amgylchiadau Esgusodol.

6.5

Pan fydd yr ymgais a oedd yn destun yr apêl yn cael ei ddiystyru, gellir ad-dalu'r ffi asesu yn rhannol neu yn ei chyfanrwydd yn unol â'r egwyddorion ym mharagraff 13.5 o Delerau ac Amodau Asesu SQE.

6.6

Pan fydd Panel yr Apêl Cam Cyntaf yn dyfarnu o blaid apêl, gall argymell camau pellach.

6.7

Bydd Cadeirydd Panel yr Apêl Cam Cyntaf yn hysbysu’r ymgeisydd o’r penderfyniad o fewn 35 diwrnod gwaith o’r dyddiad cau y bydd yn rhaid i ymgeiswyr gyflwyno eu hapêl cam cyntaf, gan roi rhesymau.

6.8

Bydd canlyniad yr apêl cam cyntaf yn cael ei gofnodi a’i gadw ar y Gofrestr Apeliadau y gallai’r Awdurdod Rheoleiddio Cyfreithwyr (SRA) ei harchwilio, a chaiff ei adrodd wrth y Bwrdd Asesu.

7

Yr apêl cam terfynol

7.1

At ddiben y Polisi hwn, mae apêl cam terfynol yn golygu cais am adolygu penderfyniad Panel yr Apêl Cam Cyntaf.

7.2

Gellir gwneud apêl cam terfynol ar y sail ganlynol yn unig:

7.2.1: Bod penderfyniad Panel yr Apêl Cam Cyntaf, neu'r modd y gwnaed y penderfyniad hwnnw i wrthod, yn cynnwys afreoleidd-dra sylweddol a/neu ei fod yn amlwg yn afresymol a/neu'n afresymegol.

7.3

Ni chaniateir cyflwyno apêl cam terfynol pan fydd Panel yr Apêl Cam Cyntaf wedi dyfarnu o blaid yr apêl cam cyntaf.

7.4

Cyflwyno apêl cam terfynol

Rhaid i ymgeisydd gyflwyno ei apêl cam terfynol o fewn 20 diwrnod gwaith o’r dyddiad y cafodd yr ymgeisydd wybod am benderfyniad Panel yr Apêl Cam Cyntaf.

7.5

Mewn achosion lle dyfernir yn erbyn yr apêl cam cyntaf, gall yr ymgeisydd ofyn am gopïau o'r dystiolaeth a gyflwynwyd i Banel yr Apêl Cam Cyntaf os bydd hyn yn ei helpu wrth benderfynu a yw am gyflwyno apêl cam terfynol ai peidio.

7.5.1: Rhaid gwneud y cais am gopïau o dystiolaeth o fewn 5 diwrnod gwaith o ddyddiad canlyniad Panel yr Apêl Cam Cyntaf.
7.5.2: Bydd y dystiolaeth yn cael ei hanfon at yr ymgeisydd o fewn 15 diwrnod gwaith o ddyddiad canlyniad penderfyniad Panel yr Apêl Cam Cyntaf.

7.6

Rhaid cyflwyno'r apêl cam terfynol ar Ffurflen Apêl Cam Terfynol SQE, sydd ar gael yng Nghyfrif yr Ymgeisydd. Rhaid iddi gynnwys manylion llawn yr apêl a chopïau o'r holl ddogfennaeth berthnasol a’r dystiolaeth i gefnogi sail yr apêl.

7.7

Codir ffi o £850 am yr apêl cam terfynol. Bydd hyn yn cael ei had-dalu os dyfernir o blaid yr apêl.

7.7.1: Pan fydd yr apêl cam terfynol yn ymwneud â chamgymeriad neu afreoleidd-dra wrth ddarparu'r cynllun addasiadau rhesymol y cytunwyd arno, caiff yr ymgeisydd ei eithrio rhag talu ffi’r apêl cam terfynol.

7.8

O fewn 2 ddiwrnod gwaith o gyflwyno'r ffurflen apêl cam terfynol, bydd yr ymgeisydd yn derbyn e-bost a fydd yn ei gyfarwyddo i ffonio'r Tîm Gwasanaethau Ymgeiswyr i dalu ffi'r apêl ac yn rhoi’r dyddiad cau iddo ar gyfer talu.

7.9

Mae cyflwyno apêl cam terfynol wedi digwydd pan fydd y ffurflen apêl cam terfynol wedi’i chyflwyno ac mae’r ffi ym mharagraff 7.7 wedi’i thalu’n llawn.

7.10

Fel a nodir ym mharagraff 1.4, disgwylir i ymgeiswyr fodloni'r terfynau amser wrth gyfathrebu â ni. Os na ellir darparu tystiolaeth berthnasol o fewn y 20 diwrnod gwaith, rhaid i ymgeiswyr gysylltu â'r Tîm Cydraddoldeb ac Ansawdd (equality.quality@sqe.sra.org.uk) i esbonio'r rheswm am yr oedi wrth gyflwyno'r dystiolaeth ysgrifenedig. Bydd y Tîm Cydraddoldeb ac Ansawdd yn cynghori'r ymgeisydd am unrhyw ddyddiad cau diwygiedig ar gyfer cyflwyno'r dystiolaeth ysgrifenedig sy’n weddill. Bydd dyddiad cau newydd ar gyfer cyflwyno apêl yn cael ei bennu erbyn dyddiad Panel yr Apêl Cam Terfynol a drefnwyd, fel a nodir ym mharagraff 8.1 o'r polisi.

7.11

Ni dderbynnir apeliadau cam terfynol a gyflwynir ar ôl y dyddiad cau ym mharagraff 7.4. Rhaid i ymgeiswyr nad ydynt yn bodloni’r dyddiad cau gyflwyno cais i gyflwyno apêl cam terfynol hwyr yn unol â pharagraff 10.

8

Y weithdrefn ar gyfer ystyried apêl cam terfynol

8.1: Bydd Panel yr Apêl Cam Terfynol yn cyfarfod o fewn 30 diwrnod gwaith o’r dyddiad cau pan fydd yn rhaid i ymgeiswyr fod wedi cyflwyno apêl cam terfynol.
8.2: Bydd tri aelod ar Banel yr Apêl Cam Terfynol, a fydd yn cynnwys dau aelod o’r panel sy’n annibynnol. Ni fydd yr un o aelodau’r panel wedi bod yn aelodau o’r Bwrdd Asesu a oedd yn ystyried apêl neu ganlyniad yr ymgeisydd nac yn aelod o Banel yr Apêl Cam Cyntaf a ystyriodd yr achos. Bydd o leiaf un o’r aelodau yn Gyfreithiwr Cymru a Lloegr (yn ymarfer neu ddim yn ymarfer). Bydd un o’r aelodau’n Gadeirydd y Panel.
8.3: Gall yr ymgeisydd ddewis gwrandawiad apêl llafar neu benderfyniad ar bapur. Os bydd yr ymgeisydd yn dewis gwrandawiad apêl llafar, mae ganddo’r hawl i gael ffrind neu berthynas gydag ef.
8.4: Rhoddir i’r ymgeisydd a Phanel yr Apêl Cam Terfynol yr holl ddogfennaeth i’w hystyried gan y Panel o leiaf 5 diwrnod gwaith cyn cyfarfod Panel yr Apêl Cam Terfynol i ystyried yr apêl. Dim ond gyda chaniatâd yr ymgeisydd a Chadeirydd y Panel y gellir dosbarthu tystiolaeth hwyr.
8.5: Os na fydd yr ymgeisydd, ar ôl dewis gwrandawiad apêl llafar, yn bresennol ynddo, bydd y gwrandawiad yn mynd rhagddo gyda’r ymgeisydd “in absentia” ac ar sail yr wybodaeth a roddwyd eisoes. Os bydd yr ymgeisydd yn rhoi rheswm derbyniol sydd wedi’i ddogfennu am ei absenoldeb, gellir aildrefnu dyddiad y gwrandawiad.
8.6: Mae’n bosibl y bydd angen i bobl eraill fod yn bresennol, at y diben penodol o ddarparu cyngor priodol yn unig. Ni chânt gymryd rhan mewn trafodaethau Panel yr Apêl Cam Terfynol ac nid oes ganddynt hawl ychwaith i bleidleisio mewn perthynas ag unrhyw benderfyniad.

9

Penderfyniad Panel yr Apêl Cam Terfynol

9.1

Bydd Panel yr Apêl Cam Terfynol yn gwneud un o’r penderfyniadau canlynol:

9.1.1: dyfarnu yn erbyn penderfyniad Panel yr Apêl Cam Cyntaf
9.1.2: dyfarnu o blaid penderfyniad Panel yr Apêl Cam Cyntaf

9.2

Ni all Panel yr Apêl Cam Terfynol newid marc pasio.

9.3

Yn achos apêl y dyfernir o’i phlaid ynglŷn â chanfyddiad o gamymarfer neu ymddygiad amhriodol, bydd marc yr ymgeisydd yn yr asesiad yn sefyll.

9.4

Fel arfer caiff ymgais ymgeisydd ei ddiystyru os dyfernir o blaid ei apêl.

9.4.1: Pan ddyfernir o blaid apêl sy’n ymwneud ag SQE2, a wnaed yn wreiddiol o dan baragraff 4.2.1 neu 4.3, bydd Panel yr Apêl Cam Terfynol yn penderfynu ar y canlyniad yn unol ag egwyddorion y Polisi Amgylchiadau Esgusodol.

9.5

9.6

Pan fydd Panel yr Apêl Cam Terfynol yn dyfarnu o blaid apêl, gall argymell camau pellach.

9.7

Bydd Cadeirydd Panel yr Apêl Cam Terfynol yn rhoi gwybod i'r ymgeisydd am benderfyniad Panel yr Apêl Cam Terfynol o fewn 15 diwrnod gwaith o'r gwrandawiad neu'r penderfyniad ar bapur, gan roi rhesymau.

9.8

Mae penderfyniad Panel yr Apêl Cam Terfynol yn derfynol.

9.9

Bydd canlyniad yr apêl cam terfynol yn cael ei gofnodi a’i gadw ar y Gofrestr Apeliadau y gallai’r Awdurdod Rheoleiddio Cyfreithwyr (SRA) ei harchwilio, a chaiff ei adrodd wrth y Bwrdd Asesu.

10

Cais i gyflwyno apêl cam cyntaf neu apêl cam terfynol yn hwyr

10.1

Dim ond dan amgylchiadau eithriadol fel a nodir ym mharagraff 10.6 y caiff apeliadau a gyflwynir y tu allan i'r terfynau amser a nodir ym mharagraffau 4.6 a 7.4 eu hystyried. Bydd Panel Adolygu yn penderfynu a ddylid derbyn y cyflwyniad apêl hwyr.

10.2

Rhaid i'r ymgeisydd gyflwyno cais ("Request") drwy e-bost i equality.quality@sqe.sra.org.uk gan gynnwys manylion i esbonio'r amgylchiadau eithriadol pam na ellid cyflwyno'r apêl erbyn y dyddiad cau yn y polisi hwn a chan nodi bod y Cais wedi'i wneud mor fuan â phosibl. Rhaid cyflwyno tystiolaeth ysgrifenedig annibynnol berthnasol i gyfiawnhau'r cais.

10.3

Pan na ellir darparu tystiolaeth ysgrifenedig annibynnol, bydd y Panel Adolygu yn penderfynu a ddylid derbyn cyflwyniad hwyr yn seiliedig ar yr wybodaeth sydd ar gael ac amgylchiadau’r Cais.

10.4

Codir ffi o £150 am Gais i gyflwyno apêl hwyr.

10.4.1: Os cymeradwyir y cais i gyflwyno apêl cam cyntaf yn hwyr, bydd ffi’r apêl sef £150 yn cael ei chredydu tuag at gyfanswm ffi’r apêl sef £350.
10.4.2: Os cymeradwyir y cais i gyflwyno apêl cam terfynol yn hwyr, bydd ffi’r apêl sef £150 yn cael ei chredydu tuag at gyfanswm ffi’r apêl sef £850.
10.4.3: Pan fydd yr apêl cam cyntaf neu'r apêl cam terfynol yn ymwneud â chamgymeriad neu afreoleidd-dra wrth ddarparu'r cynllun addasiadau rhesymol y cytunwyd arno, caiff yr ymgeisydd ei eithrio rhag talu’r ffi o £150.

10.5

Bydd Panel Adolygu yn cyfarfod o fewn 20 diwrnod gwaith ar ôl cyflwyno'r Cais sydd wedi'i gwblhau. Bydd tri aelod ar y Panel, y bydd un ohonynt yn annibynnol. Ni fydd yr un o aelodau’r panel wedi bod yn aelod o’r Bwrdd Asesu a oedd yn ystyried canlyniad yr ymgeisydd neu a wnaeth ganfyddiad o gamymarfer neu ymddygiad amhriodol. Bydd o leiaf un aelod yn Gyfreithiwr Cymru a Lloegr (yn ymarfer neu ddim yn ymarfer). Bydd un aelod yn cadeirio’r panel.

10.6

Bydd y Panel Adolygu yn penderfynu a oes amgylchiadau eithriadol, wedi'u cadarnhau gan unrhyw dystiolaeth annibynnol berthnasol, pam na ellid cyflwyno'r apêl erbyn y dyddiad cau perthnasol a bod y Cais wedi'i wneud ar y cyfle cyntaf.

10.7

Penderfyniad y Panel Adolygu

Bydd y Panel Adolygu yn dod i un o'r penderfyniadau canlynol:

10.7.1: Dyfarnu o blaid y Cais i gyflwyno apêl yn hwyr;
10.7.2: Dyfarnu yn erbyn y Cais i gyflwyno apêl yn hwyr.

10.8

Pan ddyfernir o blaid Cais i gyflwyno apêl cam cyntaf yn hwyr:

10.8.1: Rhaid i'r ymgeisydd gyflwyno ei apêl ar ffurflen apêl cam cyntaf a thystiolaeth ategol berthnasol a rhaid iddo dalu gweddill ffi’r apêl cam cyntaf sef £200 o fewn 10 diwrnod gwaith o'r dyddiad y cafodd yr ymgeisydd ei hysbysu am benderfyniad y Panel.
10.8.2: Bydd yr apêl cam cyntaf yn cael ei hystyried gan Banel yr Apêl Cam Cyntaf yn unol â pharagraffau 4, 5 a 6 o'r Polisi hwn, ar wahân i ddyddiad y Panel ym mharagraff 5.1. Bydd yr apêl cam cyntaf yn cael ei hystyried ym Mhanel yr Apêl Cam Cyntaf nesaf a drefnir.

10.9

Pan ddyfernir o blaid Cais i gyflwyno apêl cam terfynol yn hwyr:

10.9.1: Rhaid i'r ymgeisydd gyflwyno ei apêl ar ffurflen apêl cam terfynol a thystiolaeth ategol berthnasol a rhaid iddo dalu gweddill ffi’r apêl cam terfynol sef £700 o fewn 10 diwrnod gwaith o'r dyddiad y cafodd yr ymgeisydd ei hysbysu am benderfyniad y Panel.
10.9.2: Bydd yr apêl cam terfynol yn cael ei hystyried gan Banel yr Apêl Cam Terfynol yn unol â pharagraffau 7, 8 a 9 o'r Polisi hwn, ar wahân i ddyddiad y Panel ym mharagraff 8.1. Bydd yr apêl cam terfynol yn cael ei hystyried ym Mhanel yr Apêl Cam Terfynol nesaf a drefnir.

SQE Appeals Policy for assessments from May 2023 to April 2025 (PDF 216KB)

SQE Appeals Policy for assessments taken up to May 2023 (PDF 153KB)