Polisi Ffit i Sefyll

Dyddiad Cyhoeddi: Gorffennaf 2023

• Mae Polisi Ffit i Sefyll ar waith ar gyfer pob asesiad Arholiad Cymhwyso Cyfreithwyr (SQE). Cyfrifoldeb pob ymgeisydd yw sicrhau ei fod yn sefyll yr asesiad dim ond os yw’n ffit i wneud hynny. Mae bod yn ‘Ffit i Sefyll’ yn golygu nad yw’r ymgeisydd yn gwybod am unrhyw reswm pam y byddai effaith andwyol ar ei berfformiad yn ystod yr asesiad neu pam y gallai wedyn gyflwyno cais am amgylchiadau esgusodol. Dyma enghreifftiau o’r sefyllfaoedd y byddai hyn yn berthnasol iddynt:
  • salwch ymgeisydd
  • salwch perthynas agos
  • profedigaeth
• Mae’r gofyniad o ran bod yn ffit i sefyll wedi’i gynnwys yn Rheoliadau Asesu SQE ac mae’n berthnasol i bob asesiad SQE. Mae’n ofynnol i bob ymgeisydd lofnodi datganiad neu gadarnhau’n electronig ei fod yn ffit i sefyll yr asesiad. Mae’r datganiad hwn wedi’i atgynhyrchu isod. Ni chaniateir i ymgeiswyr ddechrau’r asesiad oni bai eu bod wedi llofnodi Datganiad Ffit i Sefyll.
• Os yw ymgeisydd yn credu nad yw’n ffit i sefyll asesiad SQE a’i fod am dynnu’n ôl cyn dechrau’r asesiad, rhaid iddo gyfeirio at Delerau ac Amodau Asesu’r Arholiad Cymhwyso Cyfreithwyr. Gellir darparu ad-daliad rhannol yn amodol ar gyflwyno tystiolaeth briodol o fewn yr amser penodedig.
• Os bydd ymgeisydd yn mynd yn sâl iawn yn ystod asesiad neu os yw’n wynebu amgylchiadau personol annisgwyl neu anrhagweladwy y tu hwnt i’w reolaeth resymol sy’n cael, neu sy’n debygol o gael, effaith sylweddol ac andwyol ar ei berfformiad, dylai ystyried a yw am gyflwyno cais am amgylchiadau esgusodol. Ym mhob achos, rhaid i’r ymgeisydd roi gwybod i Oruchwyliwr yr arholiad am y salwch neu’r amodau personol annisgwyl neu anrhagweladwy cyn gynted â phosibl a chyn gadael y lleoliad asesu fan bellaf. Ni fydd marciau’n cael eu haddasu oherwydd salwch, neu amgylchiadau personol annisgwyl neu anrhagweladwy eraill. Ceir manylion llawn yn Rheoliadau Asesiadau SQE a’r Polisi Amgylchiadau Esgusodol.
• Ni fydd cais am amgylchiadau esgusodol a wneir mewn perthynas ag amgylchiadau sy'n bodoli cyn yr asesiad fel arfer yn cael ei dderbyn na'i ystyried, oni bai bod ymgeisydd yn gallu dangos tystiolaeth glir pam y gwnaeth roi cynnig ar yr asesiad a llofnodi'r datganiad 'ffit i sefyll'.

DATGANIAD FFIT I SEFYLL

• Rwy’n cadarnhau fy mod wedi darllen y Polisi Ffit i Sefyll ac ni wn am unrhyw reswm a allai gael effaith andwyol ar fy mherfformiad yn ystod yr asesiad ..........(nodwch fel y bo’n briodol) neu pam y gallwn wedyn gyflwyno cais am amgylchiadau esgusodol ynghylch asesiad heddiw.
• Rwy'n cadarnhau, os byddaf yn mynd yn sâl iawn yn ystod yr asesiad hwn neu'n profi amgylchiadau personol annisgwyl neu anrhagweladwy eraill y tu hwnt i'm rheolaeth, y byddaf yn rhoi gwybod i oruchwyliwr yr arholiad cyn gynted â phosibl a chyn gadael y lleoliad asesu fan bellaf.